بولاق أبو العلا

نسيت أقولك أن معظم بيوت الحي لا يتعدي مساحتها عن 55 أو 45 متر في المُجمل. لكن كل شبابيكها علي الشارع. هو فيه متعه أجمل من الفرجة علي شوارع وحواري بولاق.البياعين السريحة وأصواتهم الجميلة وخناقات العيال وماتشات الكورة الشراب وبياع جورنال البلوظة اللي بينادي علي حادثة الست التي أكلت دراع جوزها وركلام سينما علي بابا وثلاثة أفلام في بروجرام واحد.ولا الراجل اللي بيرفع كرسي القهوة علي مناخيرة وبيرقص علي المزمار والطبلة. مهرجان مليان ألوان وبهجة وحرنكش وسكر جلآب وحب العزيز وصوت «إمام» وهو بيعزف علي الربابة الخشب. «إمام» اللي ساكن في الغرفة الضلمة القابعة خلف مخزن البراميل الخشبية.قبل ما تتعبي بمنقوع الصُرّم مية الطرشي بين قوسين.
علي لمبة سهاري نمرة عشرة يسهر «إمام» يظبّط أوتار رباباتة الخشبية قبل ماينزل السوق علي فيض الكريم.يسترزق في شوارع وسط البلد وقدام قهاوي شارع فؤاد.ويرجع يفوت ساعة المغربية علي كورنيش النيل يلحق الحبيبة قبل مايهجم عليهم الليل.وتبص البنات في الساعات وتتململ الحكايات علي شفايف ا لمرواح.
عزف «إمام» علي الربابة كان بيسحر السميعة.لما النغم اللي خارج منها يتكلم. مرة يقول بعد الصلاة علي المُكمّل أحمد أبو سن باسم. ومرة يقول.أه يا زين. أه يا زين العابدين.أه يا ورد منوّر جوه البساتين.
ومن حلاوة عزف أمام ورقص القوس علي سن الوتّر.يعتقد الأفندية الجالسين علي القهاوي والحبيبة اللي راكنين ضهورهم علي سور الكورنيش وكوعهم نايم زي القطة النعسانة في حجر البنات. أنهم يقدروا يعزفوا زي «إمام». تتم البيعة ويقبض التعريفة ويمشي وهو يبتسم ساخرا من حشرجة صوت الغراب الصادرة من الربابة.