ألف همزه فوق ألف همزه تحت

كل الاسم الّلى فوق ده ما هو إلا حرفين، حرفين و بس، و كونوا جملة اتحولت لاسم كتاب و اسم تالت قصة فيه كمان، جملة مكونة من 6 كلمات, 20 حرف و بها 13 نقطة و كل ده ممن نلخصه فى حرفين أ إ.
إيه بقى حكاية الحرفين دول ؟؟
رغم إنهم مجرد حرفين لكن مخلينى دايما فى المقدمة من صغرى، اه و الله بجد، ما تستغربش يعنى من الكلام كده و نزل حاجبك اللى إنت رفعته ده عشان هتفهم دلوقتى.
أ - أحمد
إ - إبراهيم
فلو مشينا حسب الترتيب الأبجدى فهتلاقينى في المقدمة
إنك تبقى فى المقدمة فدى ليها ضريبة كبيرة جدا لازم تدفعها.
زمااااااااان بقى و أنا صغير كنت ببقى مبسوط جدا لما المدرسة بتاعت الغياب تيجى و تقول هننادى الأسماء و اللى موجود يقول أفندم، و طبعا إسمى أنا بييجى ف الإفتتاحية و انا أول واحد بيقول أفندددددددم " بقولها بصوت عالى و بتك ع الدال من كتر الفرحة يعنى " ببقى وقتها ف قمة الإنشكاح، الفصل كله بيبصلك كده و تحسهم بيحسدوك، على ايه مش عارف الصراحة بس كنت بتحسهم كده، شغل عيال بقى.
هتلاقي تكملة القصة دي و يوميات تانية كتير للمواطن أحمد إبراهيم بس مُش القاطن بدير النحاس لا ده واحد تاني خالص، فى الكتاب ده.
ألف همزه فوق ألف همزه تحت