تعويذة شفتشي

"بين إيديكي تعويذة سحرية.. تقدري تستخدميها لفك شفرة الحياة الإيجابية.. وطلسم الحياة الزوجية.. رحلة عجيبة كلها أسرار خفية.. هتشربي فيها مشروب الطاقة الأنثوية.. وتحصلي على أكبر قوة ناعمة.. ذاتية.. شفتشي.. كتاب الأسرار.. ممنوع تداوله بين المخلوقات الذكورية.. "
"تعويذة شفتشي" للكاتبة ندى ترك، هي مهندسة معمارية ومدربة علاقات و كاتبة.صدر الكتاب عن دار توبا للنشر و التوزيع.
والنصوص التالية هي بعض ماورد في الكتاب:
"احنا اتضحك علينا.. جيل كامل من البنات ضحكوا عليه و خلوه يعيش "جوة الصندوق" المقفول بعيب و مايصحش ولازم و المفروض..و "انتي مش هتغيري العالم".
جيل كامل كان "عايش و مش عايش" .. و قاعد مستني "بكرة"..و في الآخر طلعونا رجالة و شايلين مسئوليات مش بتاعتنا.. نسينا أنوثتنا و لبسنا الجينز و الكوتشي.. وآخر كلمة كان ممكن يقولوهالنا "البسي كعب"
بس احنا كبرنا و عرفنا إن "كيدهن عظيم" و إن "المسيطر اقتصاديًا" مسيطر سياسيًا فاشتغلنا و وصلنا لشغلانات جيلنا بس اللي وصلها.. احنا غيرنا من نفسنا زي مابنغير "الاسنان اللبنية.."
واكتشفنا إن "تعليم السواقة" سهل و بقينا بنسوق مسافات ووقت أطول من سواقين التاكسيات نفسهم...
ضحكوا علينا لما قالولنا إن معرفة الناس كنوز.. واحنا كبرنا و اكتشفنا إن فيه علاقات "فيها سُمٌ قاتل" و ان "التسامح" الطريقة الوحيدة ل "راحة البال."
"سنة أولي جواز" ماطلعتش أحلي سنة.. ده احنا خدنا سنين عشان نوصل ل "الكتالوج" بتاع الرجالة اللي كانوا مخبينه علينا و محدش قالنا انهم من كوكب تاني غير لما "اكتشفت ان انا ماما" و بقيت مسئولة عن أرواح تانية..