إزيك؟ أنت طبعًا ماتعرفش أنا مين... مش لازم أصلًا! وحاليًا لو أنت ماسك الكتاب وبتقرا الكلام ده يبقى في احتمالية إنك بتفكر إنك تشتريه... وهنا عقلك هيبدأ يفكر: يستاهل يعني؟ بص كلام في سرك ماقدرش أجاوبك على السؤال ده ببساطة لأن أنت اللي لازم تحكم بعد ما تقرا! اللي قدامك ده مجموعة من التجارب الحياتية والمواقف والاعترافات الإنسانية جدًا... ممكن تلاقي في بعضها نفسك أو ممكن ماتلاقيش... بس الأكيد إن اللي في إيديك ده رحلة قصيرة لإنسان بيحاول في دنيا صعبة... ساعات بيقول كلام كتير... كلام فاضي... علي أمل إن بعد الفاضي ييجي المليان...